Føremål og ansvar

Facebook og andre sosiale media vert i Øygarden kommune nytta som supplerande verktøy for

1. å gje rask og presis informasjon om tenestene til innbyggjarane

2. å nå ut til flest mogleg ved kriser

3. brukardialog kring tenester og service

Rådmannen er ansvarleg redaktør for Øygarden si Facebook-side. Øygarden kommune tek atterhald om retten til å justera desse reglane etter behov.

Redaksjonen

«Redaksjonen» har det redaksjonelle arbeidet med kommunen si Facebook-side, og held oppsyn med at diskusjonsreglane vert haldne. Det daglege arbeidet med administrering og publisering av innhald på sida, vert utført dei tilsette i «redaksjonen»: Beate Hetlevik; Silvia Haugland og Ingunn Teigen.

Redaksjonen svarer på spørsmål, rettar opp feil og kommenterer på ein sakleg og nøktern måte. Dei signerer med «kundevert servicetorget»

I spørsmål om saker viser me til politiske vedtak eller til rådmannen si innstilling dersom saka er i den administrative sløyfa. 

Det er berre redaksjonen som svarar på førespurnader og  meldingar direkte til Øygarden kommune. (det vil koma endringar seinare)

Ved krisesituasjonar, der rådmannen har sett krisestab, skal all kommunikasjon gå via krisestaben, dersom ikkje anna er avtalt.

 «Facebook» er ikkje meint som ei dør inn til kommunen når det gjeld ordinære saker og sakshandsaming. Innspel, spørsmål og svar sendt via Facebook, vert derfor til vanleg ikkje journalført.

Øygarden kommune følgjer arkivlova når det gjeld journalføring og grunngjeving for om kommunikasjon er arkivverdig og journalpliktig.

Revisjon:

Retningslinene gjeld eit felt der vi heile tida gjer nye erfaringar, og som heile tida utviklar seg, og vi vil ha trong for å revidera retningslinene i tråd med utviklinga, ressursar og kapasitet. Redaksjonen kan kontaktast slik:   redaksjon@oygarden.kommune.no eller servicetorget@oygarden.kommune.no

Tilsette sin personlege bruk av media

Frå Etiske retningsliner for Øygarden kommune:

 «Tilsette skal vera varsame med å uttala seg i sosiale medium (til dømes Facebook og Twitter) om tilhøve som gjeld kommunen. Slike medium skal ikkje nyttast i arbeidstida om det ikkje har samanheng med arbeidet som skal utførast.»

1. Ver medviten på rolla di som tilsett i Øygarden kommune når du kommenterer og skriv på sosiale media.

2. Ver gjerne aktiv i faglege diskusjonar, og  ver open om kor du jobbar når det er relevant. Det er fint om du støttar opp om måla og visjonane våre.

3. Tenk på korleis du opptrer på sosiale media. Du bør ikkje vera «ven» med eigne elevar, brukarar, pårørande eller leverandørar.

4. Det kan vera me sjølv meiner me kan skilja rollene våre når me er på sosiale media. Viktigare er det at dei som les ser denne skilnaden. Dette kan ofte vera vanskeleg, særleg når melding eller kommentar er sendt i arbeidstida!

5. Ver alltid varsam med ironi og sarkasme og hugs at teieplikta gjeld óg i sosiale mediar

Diskusjonsreglar på Facebook

1. Ver venleg  og kommentér  VEGGMEDINGAR ved å leggja inn kommentar under innlegget, ikkje med ny veggmelding.

2. Respekter dine meddebattantar, også dei som er usamde med deg. Trugsmål, stygge ord, banning og personangrep, vert ikkje akseptert og kan verta sletta.

3. Innlegg og kommentarar som kan medføra straffeansvar, er ærekrenkande, rasistiske, trugande, obskøne eller på annan måte er i strid med norsk lov, vil bli sletta og vurdert meldt til politiet. Stadige overtramp vil føra til utestenging.

4 Lenker til eksterne nettsider med innhald av grov karakter vert heller ikkje aksepterte.

5. Me er alle personleg ansvarlege for det me sjølv skriv på sosiale media.

6. Diskuter sak, ikkje person!

7. Innlegg skal skrivast på skandinavisk eller engelsk.